ನಿವೇದನೆ

ವೇದನೆ ವೇದನೆ
ನನ್ನ ಮನಸಿನ ಪರಿಶೋಧನೆ
ಗೆಳತೀ ನಡೆಸಿದೆಯಾ, ನಿನಗೇ ಅರಿವಿದೆಯಾ
ವೇದನೆ ವೇದನೆ, ಈ ಮನಸಲಿ ಬರೀ ವೇದನೆ.

ಇಳೆಯು ಬಲು ಸುಂದರ ಕಾಣುವ ಮಂದಿರ
ಅಲ್ಲಿ ಶಾಂತಿಯ ಸಣ್ಣ ಹೊಂಗಿರಣ
ಪ್ರಶಾಂತದ ತಂಪು ಸಿಹಿ ಹೂರಣ
ಇದ್ದರೆ ನೀ ತಿಳಿಸುವೆಯಾ, ಗೆಳತಿ ನನಗೆ ಕೊಡಿಸುವೆಯಾ.

ವೇದನೆ ವೇದನೆ
ನನ್ನ ಮನಸಿನ ಪರಿಶೋಧನೆ........

ಬದುಕು ಸುಖ ಸಾಗರ, ಪಯಣಿಗ ದುಃಖದಾಗರ
ಅಲ್ಲಿ ನಗುವಿನ ಮುತ್ತು ನೀರಲಿ
ಸುತ್ತ ಸುಳಿಯುವ ಭಯದ ಕಾಡಲಿ
ದೊರೆತರೆ ನೀ ತಿಳಿಸುವೆಯಾ, ಗೆಳತಿ ನನಗೆ ಕೊಡಿಸುವೆಯಾ.
ವೇದನೆ ವೇದನೆ
ನನ್ನ ಮನಸಿನ ಪರಿಶೋಧನೆ
ಗೆಳತೀ ನಡೆಸಿದೆಯಾ, ನಿನಗೇ ಅರಿವಿದೆಯಾ
ವೇದನೆ ವೇದನೆ ಈ ಮನಸಲಿ ಬರೀ ವೇದನೆ.

************ಜಯಸುತ*************

ಪಿಸು ಮಾತಿನ ಪಲ್ಲವಿ

ಪಿಸುಗುಟ್ಟುವ ಮಾತಲಿ
ಕನವರಿಸುವ ಕನಸಲಿ
ಏನೇನೋ ವಿಷಯ ಅಡಗಿದೆ,
ಎದೆಯಾಳದ ಗೂಡಲಿ
ಕಣ್ಣಂಚಿನ ಮಿಂಚಲಿ
ಏನೇನೋ ವಿಷಯ ಅಡಗಿದೆ,
ಎರಡು ಮನಗಳ ಒಳಗೆ
ಏನೋ ನಡೆದಿದೆ,
ಎರಡು ಹೃದಯಗಳ ಒಳಗೆ
ಒಲವು ಮೂಡಿದೆ,
ಪ್ರೀತಿಯಲಿ ತೇಲಿದೆ
ಹೊಸಥರ ಅನಿಸಿದೆ.

ಪಿಸುಗುಟ್ಟುವ ಮಾತಲಿ
ಕನವರಿಸುವ ಕನಸಲಿ
ಏನೇನೋ ವಿಷಯ ಅಡಗಿದೆ.........


ಮನಸೊಳಗೆ ಬೆಚ್ಚನೆಯ
ನೂರಾರು ಮಾತುಗಳು,
ಕನಸೊಳಗೆ ತಣ್ಣನೆಯ
ನೂರಾರು ಕನಸುಗಳು,
ತೆರೆದಿಟ್ಟವು ಬಾನಿನಲ್ಲಿ
ಚಂದಿರನ ಊರಿನಲ್ಲಿ,
ಬೆಳದಿಂಗಳ ಇರುಳಿನಲ್ಲಿ
ಕೈಹಿಡಿದು ನಡೆದವಲ್ಲಿ.
ಪಿಸುಗುಟ್ಟುವ ಮಾತಲಿ
ಕನವರಿಸುವ ಕನಸಲಿ
ಏನೇನೋ ವಿಷಯ ಅಡಗಿದೆ.........

ಹೊಸದಾಗಿ ಬಾಳಿನಲ್ಲಿ
ಉಲ್ಲಾಸದ ಕ್ಷಣಗಳು,
ನೆನಪಲ್ಲೇ ಕಳೆವ ಆ
ಮಂಜಿನ ಹನಿಗಳು,
ಉಸಿರಿನಲ್ಲಿದ್ದರು
ಕೈಗೆಂದು ಬಾರವು,
ಬೆಸುಗೆ ಬಂಧವೂ
ಪ್ರೀತಿಯೇ ಚೆಂದವು.

ಪಿಸುಗುಟ್ಟುವ ಮಾತಲಿ
ಕನವರಿಸುವ ಕನಸಲಿ
ಏನೇನೋ ವಿಷಯ ಅಡಗಿದೆ.........

***********ಜಯಸುತ************

ನೀ ನನ್ನ ನೋಡಿದಾಗ

ನೀ ನನ್ನ ನೋಡಿದಾಗ,
ಕಣ್ಣಲ್ಲಿ ಒಲವಿನ ಸಂಚಾರ.
ನೀ ಮಾತನಾಡಿದಾಗ,
ಮನದಲ್ಲಿ ಪ್ರೇಮದ ಜೇಂಕಾರ.
ಸುಧೆಯಾಗಿ ಹರಿದಿದೆ ಪ್ರೀತಿ ಎದೆಯಾಳದೆ,
ಕನಸೊಂದು ಕಣ್ಣ ತುಂಬಿ ಮಿಂಚಾಗಿದೆ.
ಬಾಯಿಬಿಟ್ಟು ಹೇಳಲಾರೆ ನಿನ್ನೆದುರಲಿ,
ಕಟ್ಟಿ ಹಾಕಿದೆ ಮನವು ಏನು ಮಾಡಲಿ.
ನೀ ನನ್ನ ನೋಡಿದಾಗ,
ಕಣ್ಣಲ್ಲಿ ಒಲವಿನ ಸಂಚಾರ........

ಹೃದಯ ತೊರೆದು ಹೋಗು ಎಂದು
ಹೇಳಲಾರೆ ಪ್ರೇಮಕೆ,
ಕಣ್ಣ ಮುಂದೆ ಇರುವ ನಿನ್ನ
ಕಳೆದುಕೊಳ್ಳದ ನಂಬಿಕೆ,
ಯಾರೋ ಏನೋ ಎಂದಾರೆಂದು
ಭಯವು ಪ್ರೀತಿಗೇತಕೆ,
ಸುಮ್ಮನೆ ಪ್ರೀತಿಸಬೇಕು
ಅನ್ನೋ ಆ ಬಯಕೆ.
ಕೇಳೆ ನೀನು ಓ ಒಲವೇ
ನನ್ನ ಮನಸ ಕದ್ದಿರುವೆ,
ಎಷ್ಟು ಬಾರಿ ಯೋಚಿಸುವೇಕೆ
ತಿಳಿಸು ನಿನ್ನಯ ಒಪ್ಪಿಗೆ.

ನೀ ನನ್ನ ನೋಡಿದಾಗ,
ಕಣ್ಣಲ್ಲಿ ಒಲವಿನ ಸಂಚಾರ........

ಪ್ರೇಮ ಕಥೆಗಳ ಪುಟಗಳಲಿ
ನಿನ್ನ ಹೆಸರಿನ ಪದಗಳೇ,
ಎಷ್ಟು ಸಲ ಓದಿದರೂನು
ಮರಳಿ ಓದುವ ಬಯಕೆಯೇ.
ಕವಿಯು ನಾನು ಕವಿತೆ ನೀನು
ಅನ್ನೋ ಒಂದು ಕಲ್ಪನೇ,
ನನ್ನ ನಿನ್ನ ಪ್ರೀತಿಯ ಪಯಣ
ನಿಜಕೂ ಬಲು ಚೆಂದಾನೇ.
ಇಷ್ಟು ಹೇಳಿಕೊಂಡರೂ
ಮುಗಿಯದು ಪ್ರೇಮದ ವಂದನೆ,
ನನ್ನ ಪ್ರೀತಿಸುವೆ ನೀ ಎಂಬ
ಮಾತದು ನನ್ನ ನಿವೇದನೆ.

ನೀ ನನ್ನ ನೋಡಿದಾಗ,
ಕಣ್ಣಲ್ಲಿ ಒಲವಿನ ಸಂಚಾರ........

*----- ಜಯಸುತ -----*